“Otello, Arapi i Vlorës” romani i dytë i Ben Blushit

Plot një vit pas suksesit të madh të librit të tij të parë “Të jetosh në ishull”,me mbi 20.000 kopje të shitura në dhjetë muaj, shkrimtari Ben Blushi vjen para lexuesit me romanin e dytë të tij “Otello, Arapi i Vlorës”. Version multimedial i ketij lajmi

TIRANE- Shkrimtari Ben Blushi vjen para lexuesit me romanin e dytë të tij “Otello, Arapi i Vlorës” plot një vit pas suksesit të madh të librit të tij të parë “Të jetosh në ishull”,me mbi 20.000 kopje të shitura në dhjetë muaj. Ngjarjet shtrihen në vitet 1300-1400 dhe zhvillohen në dy qendra urbane të njohura të kohës së Mesjetës, në Venedik dhe në Vlorë, marrëdhëniet politike e tregtare midis të cilave ishin mjaft intensive për kohën.
Sfondi historik i romanit është real ndërsa gjetja më origjinale dhe intriga më e pabesueshme e autorit janë personazhet që gjallojnë në libër, të cilat ai i ka marrë nga Shekspiri, nga tragjedia e njohur “Otello, Arapi i Venedikut”.
Vendosja e ngjarjeve dhe veprimi i personazheve në brigjet veriore të Mesdheut, në dy qytete të njohur të epokës së Mesjetës, i kanë shërbyer autorit për të shprehur idetë, ndjesitë dhe filozofinë e tij për marrëdhëniet shoqërore-shpirtërore dhe tiparet themelore të kohës, por mbi të gjitha për dashurinë. Romani i ri i Blushit është një vepër e mirëfilltë letrare ku trilli i autorit dhe e vërteta historike janë të lidhura aq fort, sa të bën të besosh se kështu ka ndodhur me të vërtetë në Vlorën e para 600 vjetëve.